بوراسی قوم!

آذربايجانین چيرپينان مذهبی-سییاسی اورگی!

بویون جومعه گونو 1386جی خورداد آی­نین 4و سحر ساعات 7دن آخشام ساعات 7ه جان حضرت معصومه­نین حرمینه گئدنلر اولاجاغییدی! و گلنلر وار! آذربايجانین شهرلریندن و تورک دیلینده دانیشانلار وار! حضرت معصومه­نین ضریحینه یاپیشیب و ایستکلرین سویله­ییرلر:

1- آی آنا! اوغلوم بئکاردیر، یاردیمچی اول!
2- آی آنا! قیزیم ائوده قالیب ائلچی­سی یوخدور! یاردیمچی اول!
3- آی آنا! آتام خسته خانادا درد ایچینده یانیر! یاردیمچی اول!
4- آی آنا! آنامین اؤرگی ایشدن دوشمکده دیر! یاردیمچی اول!

بو آرادا بیر نئچه نفر ده یانیق اورکلرین ضریحه یاپیشدیریب و بیر میللتی دوشونرک آنالاری فاطمه معصومه نی چاغیریرلار. یا حضرت معصومه، بویوک آنامیز حضرت فاطمه زهرانین ایلدونومونه 4 گون قالیر! سنی آد وئریریک حضرت محمد اوپن سینه­نین یارالارینا! سنی آد وئریریک قاپی-دووار آراسیندا اورگی اوخلانان کوثرین حوسئین بالاسینین کربلادا آخان قانینا، سنی آد وئریرک ریضا بالاوین غوربت شهرده زهرلنمیش جییرینه، سنی آد وئریریک آذربایجان تورپاقلارینداحاق یولوندا قانا باتان حوسئنچی شییعه­لریوه آذربایجان تورک میللتینه یاردیمچی اول!

- آی آنا! آذربایجان درد ایچینده بوغولموش! یاردیمچی اول.
- آی آنا! تبریز قانا بویاندی! یاردیمچی اول!
- آی آنا! سولدوز قانا بویاندی! یاردیمچی اول!
- آی آنا! خییاودا قانلار آخدی! یاردیمچی اول!
- آی آنا! اورمودا کورپودن آداملار یئره آتیلدی! یاردیمچی اول!
- آی آنا! قوشاچایدا ایگیدلر یوخ اولوندو! یاردیمچی اول!
- آی آنا! زنجاندا اؤز دیلینده دانیشماغا اوتانانلار اولدو! یاردیمچی اول!
- آی آنا! اردبیل­ده لئیسانلی بالان توتساقلاردا اسیر اولموش! یاردیمچی اول!
- آی آنا! ائلیاز یئکانلی گنج یاشیندا درده دوشدو! یاردیمچی اول!
- آی آنا! عصمتلی قیزلاریوین عصمتیه توخوندولار! یاردیمچی اول!
- آی آنا! اوغلانلارین بئکارلیقدا هونرین الدن وئردی! یاردیچی اول!
- آی آنا! دیلیمیزه، دینیمیزه یاردیمچی اول!
- آی آنا! آریاچیلار هر زادیمیزا توخوندولار! یاردیمچی اول!
- ...
-
قوم چالیشقان تورکلریندن نئچه اون نفر حرمده توپلانیب و قودوز وحشی رژیمین مأمورلارینین اؤنونده گوستری یاپمادادیلار! نه چوخ وار مأمور! اللرینده سیم­سیز آراج حرمی دولانیرلار و هرکسه شک ائدیرلر حرمدن ائشییه سالیرلار. حرمین دؤرونده اودسوندوردن ماشین و بیر نئچه امنییه ماشینی گؤرولور! بوللو شخصی پالتاردا دولانان مأمورلار واردیلار.

قومون چالیشقانلارینین اؤرگی حضرت معصومه­نین حرمینده اورکدن خانیمی سسلین زییارتچی­لرین ناله­لری ایله چیرپینماقدادیر. "حجة الاسلام عظیمی قدیم حرمه یئتیرمه­میش توتوقلانیب ائولرینه دوغرو یوللاندیریلیب" اس.ام.اسی یئتیریر. باشقا چالیشقانلارین دا ائولرینین اطرافیندا مأمور قویولوب و اونلاری ائوده آیت الله سید شریعتمداری کیمی توتساقلاندیریبلار. تمام شهرلرده نیظامی حکومت یارانیب: تبریزده، اورمودا، اردبیل­ده، زنجان­دا، سولدوزدا، مرندده، قوشاچای­دا، خییاودا، و ..!

و بیز آند ایچیریک کی آذربایجانین مظلوم شهرلرین، آذربایجانین سینرلاریندا اوزاقدا دوشموش شهرلرین ایسارتدن بوراخاجاییق! داها حضرت معصومه­نین زییاریتینه گئتمه­یه هئچ کسدن اذن آلمییاجاییق! آذربایجانین مشهدینی­ده، قومونودا، و اوزاق-اوزاق دوشن ائلیمیزی شیرازدا دا ایسارتدن بوراخاجاییق! ال-اله، چیگین-چیگینه!