سونومتول یازی
سید حیدر بیات
۲ قئزاران, ۱۳۸۶, ۰۳:۵۴
بو ایل یولداشلار لوطف ائدیب، نئچه نئچه کنفرانسا دعوت ائتمیشدیلر. ایل دؤنندن بری اوچ دانا سفریم لغو اولوبدور. بیریسینده اوچاق بیلیتیم بیریسینده ایسه ویزام یانیبدیر. بونون نده نی پاسبورتومون اونایلانماماسیدیر. اولسون اؤلکه دن ائشیگه چیخماریق دا، آتام چیخمادی نه اولد کی. منیم آتام اؤلکه دیشینه گئتمه میشدی. آمما بؤیوک بابام اورسئیتده و باکی دا قالمیشدی، گلنده ده آغیر پول و قیزیل دسته لی قمه و آلتی آچیلان گتیرمیشدی، اوندان علاوه سنتی حکیملیک اؤیرنیب گلمیشدی. نه ایسه آتام اونا چکمه میشدی، آمما من دئدیم بؤیوک باباما چکیم و اؤلکه دیشینی بیر گؤروم ده آخی نه اولار کی؟ هر حالدا بو ایل بول بول دعوتلر گلسه ده پاسبورت دیواری اؤنومده قالدیریلمیشدی، بو ایشین نده نی نه ظاهیرده قانونی بیر سؤزده دئسه لر آنجاق ایچریده تام غیر قانونی بیر ال مانع اولوردو. اولسون، مئیدانا گیرمیشیک اویناماغادا، بیز بونلاردان نه اوما بیلریک کی؟ للک یاستیغی؟.
آنجاق دونن قزوین بیلیم یوردوسوندان بیریسی زنگ آچدی: نسیمی آدینا بیر تؤرن قوروروق و….
اولسون دئدیم. و سونرا مسینجیرده یولداشلارین بیریسینه یازدیم: قزوینه گئدرم او کی داها پاسبورت ایسته میر.
ایکی ساعات کئچمه میشدی گؤردوم محکمه نین احضاریه سینی قاپیمیزا گتیردیلر. بونون آنلامی بو ایدی کی محکمه ایله نسیمی تؤره نی برابر زاماندا اولدوقلاری اوچون او تؤره نه ده قاتیلا بیلمه یه جه یم.
اولسون دئمه لی قزوینده پاسبورت ایسته ییرمیش.
یازیدان سونرا:
بیر ساعات سونرا محکمه یه گئدیرم. طبیعی کی تورکلوک سوچونا. بیلمیرم سونو نه اولاجاق. آنجاق حبسه وئریلسم داها یازا بیلمه یه جه یم. بو بیر آز آجی. آنجاق گؤرنمه سک حلال ائدین بیزلری. بوراخیلسامسا یئنه یازاجایام. آنجاق سؤز وئریرم کی قلمی یئره قویمایام. بیزیم توتمیمیز قلم.
0 Comments:
Post a Comment
<< Home